El funcionamientu y xestión del ALMACÉN D´HORROS del Principáu d’Asturies va axustase a estes instrucciones, ensin perxuiciu’l cumplimientu de la normativa que resulte aplicable.

L’ALMACÉN D´HORROS ye un proyectu promovíu pola Dirección Xeneral de Cultura y Patrimoniu’l Principáu d’Asturies col oxetivu d’apoyar el caltenimientu y rehabilitación de los horros y paneres d’Asturies pente medies del almacenamientu y xestión de pieces reutilizables coles que yá nun proceda facer actuaciones de conservación o pa la recuperación nel futuru de bienes que tean desmontaos.

La titularidá del proyectu correspuende al Principáu d’Asturies y la so xestión a quien esti determine. Na actualidá la xestión faise de forma coordinada ente La Fundación Centro Tecnológico y Forestal de la Madera (d’equí p’alante CETEMAS) y l’Asociación del Hórreo Asturiano (d’equí p’alante AHA).

CETEMAS va xestionar l’almacenamientu y conservación de les pieces y la so entrega a los profesionales que les precisen; y l’AHA la recoyida, treslláu y entrega al ALMACÉN D’HORROS de los bienes. Dambes entidaes van actuar de mou coordináu garantizando la correcta xestión del proyectu.

La recoyida de les pieces va riquir d’una orde anterior de la Dirección Xeneral de Patrimoniu y Cultura, que va identificar los elementos afectaos, va dexar afitaes les condiciones particulares de l’actuación y va axuntar el documentu de cesión por parte de la propiedámodelu anexu 1y va comunicar la intervención a la propiedá y al Conceyu correspondiente.

L’AHA va realizar les tarees de desmontaxe, treslláu y entrega de les pieces reutilizables ensin paletizar a CETEMAS nel ALMACÉN D’HORROS y va inxertar una memoria técnica de caúna de les actuaciones.

Sicasí, cualquier persona va poder donar pieces al ALMACÉN D’HORROS que procedan d’actuaciones axustaes al ordenamientu o d’orixe desconocíu.

Una vegada reciba les pieces, CETEMAS va proceder a realizar les tarees de conservación y almacenamientu que sían necesaries asina como a la so documentación, axuntando la mesma a una base de datos específica que permita la xestión posterior.

Les pieces correspondientes a horros o paneres desmontaos/es, van conservase como conxuntu si asina lo precisara’l valor del bien o si la cesión conxunta favoreciera la rehabilitación.

L’ALMACÉN D´HORROS va ceder les pieces a profesionales de la rehabilitación y conservación d’horros y paneres d’Asturies qu’habrán dase d’alta nel mesmu pente medies d’una declaración responsable d’alcuerdu col modelu que s’axunta como anexu 2.

Una vegada incorporada l’alta, los profesionales van poder facer la solicitú de pieces pa intervenciones de conservación o rehabilitación concretes, responsabilizándose del so usu correctu nelles. Nesi sen va presentase una declaración responsable na que se van identificar les pieces cedíes, les actuaciones nes que se van emplegar, el plazu pa la so realización y l’adecuación a la intervención qu’ha d’axustase a la llegalidá. Ha d’axuntase propuesta técnica d’intervención y tamién habrán d’inxertar la solicitú de llicencia municipal nel casu de ser necesaria.

La solicitú que tendrá que ser individualizada pa cada intervención y referise a horros o paneres protexíos/es habrá d’axustase al modelu anexu 3.

Las solicitúes habrán ser informaes pola AHA y CETEMAS y cada cesión va conseñase nun documentu qu’identifique, les pieces entregaes, l’actuación na que se van emplegar, el plazu d’utilización y el profesional responsable (modelu anexu 4).

Al acabar l’actuación, el profesional responsable, va presentar una declaración na que s’informe sobre la utilización de les pieces, asina mesmo, habrá de devolver les que nun s’usaren. La declaración tien que s’axustar al modelu anexu 5.

L’incumplimientu de los compromisos asumíos va informase a la Dirección Xeneral de Cultura y Patrimoniu que podrá determinar la baxa del sistema y la lliquidación del valor de los bienes mallograos o los perxuicios causaos.

Les pieces que se califiquen como especiales pol so valor históricu, artísticu o etnolóxicu, namás se van ceder p’actuaciones que xustifiquen dafechu la so utilización.

Tamién van considerase especiales aquelles pieces que, ensin tener especial valor de manera individual, formen parte d’un horru o panera desmontáu/da que sí lu tenga y, por ello, tenga que ser rehabilitáu/da.

En dambos casos, l’informe técnicu de CETEMAS y l’AHA va ser específicu y minuciosu y, pa la cesión, va precisase l’autorización de la Dirección Xeneral de Cultura y Patrimoniu del Principáu d’Asturies.

CETEMAS y l’AHA van dase l’apoyu técnicu necesariu pa llevar alantre cualquiera de les tarees que rica la xestión del ALMACÉN D’HORROS, y en particular, pa la calificación de les pieces, la so conservación y utilidá, les altes de profesionales, les cesiones de pieces y la xustificación d’un usu correctu.

Con carácter añal, CETEMAS y la AHA van presentar a la Dirección Xeneral de Cultura y Patrimoniu del Principáu d’Asturies un informe de xestión nel que s’incluyan tolos datos de funcionamientu, se detallen los incumplimientos de normativa o compromisos y se propongan les midíes de meyora y correición a tomar. Amás, l’AHA va facer un informe d’actuaciones nes que s’usaren pieces cedíes que va incluyir obligatoriamente les que se refieren a casos especiales y una muestra del restu.

CETEMAS y la AHA van tar en contactu colos profesionales del sector col envís de tener en cuenta les propuestes de meyora que puedan plantegar.

La Dirección Xeneral de Cultura y Patrimoniu del Principáu d’Asturies va poder facer en cualquier momentu actuaciones d’inspección y control del ALMACÉN D’HORROS y solicitar a CETEMAS y a l’AHA informe sobre cualquiera de les característiques del so funcionamientu.

La información necesaria pal funcionamientu del ALMACÉN D’HORROS va tar disponible na web de CETEMAS y l’AHA.

La financiación del ALMACÉN D’HORROS va corresponde-y al Principáu d’Asturies debiendo constar el logu la Conseyería de Cultura, Política Llingüística y Turismu en tola información que per cualquier vía se ponga a disposición de terceros.