QUÉ YE PEGOLLU
Proyectu promovíu pola Dirección Xeneral de Cultura y Patrimoniu del Principáu d’Asturies en collaboración cola Fundación CETEMAS y l’Asociación del Horreo Asturiano (AHA) pa sofitar el mantenimientu y rehabilitación de los horros y paneres asturianos per mediu del almacenamientu y xestión de pieces reutilizables procedentes de bienes desmontaos pa la so posterior recuperación o colos que yá nun proceda realizar actuaciones de conservación.
Al oxetivu de conservación del patrimoniu cultural axúntase-y l’envís de sirvir al principiu de sostenibilidá qu’impón l’usu de los recursos, materiales y personales, disponibles nel entornu y, específicamente, al traviés de la obligación de la reutilización afayadiza de materiales, evitando la innecesaria sustitución d’elementos orixinales.
Por ello, el proyectu asítiase nun modelu de producción y consumu qu’implica compartir, reutilizar, reparar y reciclar materiales y productos toles veces que sía posible pa crear un valor añadíu (economía circular)..
La recoyida d’horros o paneres y el treslláu al almacén solo va poder realizalu l’Asociación del Hórreo Asturiano previa autorización de la Dirección Xeneral de Patrimoniu y Cultura del Principáu d’Asturies declarando’l bien como irrecuperable.
Nengún profesional o particular va poder treslladar les pieces al almacén.
L’ALMACÉN D´HORROS namás va ceder les pieces a profesionales de la rehabilitación y conservación d’horros y paneres daos/es d’alta nel mesmu. L’alta solicitaráse pente medies d’una declaración responsable d’alcuerdu col modelu anexu 2.
Una vez daos d’alta, los profesionales van poder facer la solicitú de pieces pa intervenciones de conservación o rehabilitación concretes nel territoriu asturianu, responsabilizándose del so usu correctu n’elles. La solicitú y cesión tienen de realizase del mou conseñáu na normativa aplicable y al traviés de la documentación asitiada na zona pa profesionales acreditaos.
En nengún casu se van ceder pieces a particulares, empreses o profesionales que nun tean daos d’alta nel sistema.